Мындан улам Sputnik маалымат агенттигинин журналисти Гүлдана Талантбекова өнөр адамы тууралуу 7 факты даярдады.
Көлдүн ак-куусу эле… 1975-жылы 4-январда Ысык-Көл облусунун Жети-Өгүз районунун Ак-Терек айылында туулган. Жети бир туугандын үчүнчүсү. Бала кезинде айтканынан кайтпаган шок кыз болгон. Бирок окуусун жакшы окуп, математика сабагынан республикалык олимпиадаларга катышып, алдыңкы орундарга ээ болгон.
Ырчы болом деп окуу жайын алмаштырган. 1992-жылы айылдык орто мектепти күмүш медаль менен аяктагандан кийин атасынын айтканы менен Бишкек шаарындагы Финансы техникумуна өтөт. Бирок чыгармачылыкка каалоосу күч Элмира Токтогул Сатылганов атындагы филармониянын алдындагы эки жылдык студияга тапшырып, кийин Бүбүсара Бейшеналиева атындагы искусство институтун бүтүргөн.
Актрисалык менен куудулдукка шыгы күч ырчы. Убагында шаардык Арсен Өмүралиев атындагы Бишкек шаардык драма театрынын ырчы-солисти болуп иштеп жүргөндө спектаклде ойноп актрисалык дареметин да сынап көргөн. Кесиптештеринин айтымында, куудулдукка да жөндөмдүү эле.
Берилбей калган мамлекеттик сыйлык. Таланттуу ырчы өзүнүн аз өмүрүндө мукам үнү менен угармандардын сүймөнчүлүгүнө айланып, бирок, тилекке каршы, эч кандай мамлекеттик наам албай кетти.
24 жаштагы Беназир аттуу кызы бар. Ырчылык өнөр кызына да берилген, бирок апасы убагында сахнага чыгышын каалаган эмес. Беназир борбордогу Финансы-экономикалык техникумун аяктап, президенттин алдындагы башкаруу академиясын бүтүргөн. Учурда жеке фирмалардын биринде иштейт.
Шаштырган өлүм. 31-август күнү жүрөгү кармап, ооруканага жетпей көз жумган. Сөөгү 2-сентябрда Бишкектин четиндеги Орок айылындагы мүрзөгө коюлган. Ырчынын жакын курбусу Нуриза Абасованын айтымында, бир жыл мурун гинекологиялык жактан операция болгон. Маркум акыркы кезде жүрөгү сайгылашып жүргөнүн айтып, бирок дартка анчейин маани берген эмес.
